ആഗോളതാപനത്തിന്‌ വിമാനങ്ങളും

ആഗോളതാപനത്തിന്റെ രൂക്ഷത ലോകജനത അനുഭവിച്ച്‌ തുടങ്ങിയിട്ടേയുള്ളു.മനുഷ്യന്റെ പ്രവര്‍ത്തനങ്ങള്‍ തന്നെയാണ്‌ ആഗോളതാപനത്തിന്‌ വഴിവെക്കുന്നതെന്ന്‌ തിരിച്ചറിഞ്ഞിട്ടും കാര്യമായ പ്രതിരോധത്തിന്‌ പോലും നമുക്കു കഴിഞ്ഞിട്ടില്ല.ഇപ്പോള്‍ ആഗോളതാപനത്തിന്‌ കാരണക്കാരായി വിമാനങ്ങളും എത്തിയിരിക്കുന്നു.ഒരു പുതിയ പഠനം വെളിവാക്കുന്നത്‌ വിമാനങ്ങള്‍ വന്‍തോതില്‍ ആഗോളതാപനത്തിന്റെ പ്രധാന ഘടകങ്ങളിലൊന്നായ കാര്‍ബണ്‍ഡയോക്‌സൈഡ്‌ പുറന്തള്ളുന്നുവെന്നതാണ്‌.അടുത്ത പത്ത്‌ വര്‍ഷത്തിനുള്ളില്‍ വിമാനങ്ങള്‍ പുറന്തള്ളുന്ന കാര്‍ബണ്‍ഡയോക്‌സൈഡിന്റെയും മറ്റ്‌ വാതകങ്ങളുടെയും അളവ്‌ വളരെ കൂടുതലാകുമെന്നും ഇത്‌ 2050 ഓടെ ആഗോളതാപനത്തെ ഏറ്റവും ഗുരുതരമായ അവസ്ഥയില്‍ എത്തിക്കും എന്നുമാണ്‌ പഠനം പറയുന്നത്‌.ഇപ്പോഴത്തെ സാഹചര്യത്തില്‍ ആഗോളതാപനത്തിന്‌ ഏറ്റവും അധികം സംഭാവന നല്‍കുന്നത്‌ വ്യോമഗതാഗതമേഘലയാണെന്നാണ്‌ ബെഥന്‍ ഒവനും സഹപ്രവര്‍ത്തകരും നടത്തിയ പഠനത്തില്‍ വ്യക്തമായത്‌.60 ശതമാനത്തോളമാണ്‌ ഇത്തരത്തില്‍ വാതകങ്ങള്‍ പുറന്തള്ളപ്പെടുന്നത്‌,ക്യോട്ടോ പ്രോട്ടോക്കോളില്‍ ഇത്‌ ഉള്‍പ്പെട്ടിട്ടില്ലെന്നതാണ്‌ വസ്‌തുത.കാര്‍ബണ്‍ഡയോക്‌സൈഡാണ്‌ വലിയ അളവില്‍ ആഗോളതാപനത്തിന്‌ കാരണമാകുന്നത്‌ ഇത്‌ 2100 ആകുമ്പോഴേക്കും ഇപ്പോഴത്തേതിന്റെ ഏഴ്‌ മടങ്ങ്‌ ഇരട്ടിക്കുമെന്നാണ്‌ പഠനം പറയുന്നത്‌. എയര്‍ ക്രാഫ്‌റ്റ്‌ ടെക്‌നോളജിയില്‍ പുതിയ ആശയങ്ങളും പരീക്ഷണങ്ങളും ഉണ്ടാകുന്നുണ്ടെങ്കിലും അവയൊന്നും വാതകങ്ങള്‍ പുറന്തള്ളുന്നത്‌ കുറയ്‌ക്കാന്‍ പര്യാപ്‌തമാകുന്നില്ല.എസിഎസ്‌ എന്‍വയോണ്‍മെന്റല്‍ സയന്‍സ്‌ ആന്‍ഡ്‌ ടെക്‌നോളജിയില്‍ പഠനം പ്രസിദ്‌ധീകരിച്ചിട്ടുണ്ട്‌.